Flottur langbakur frá Kia

Kia mun sýna þennan nýja bíl á bílasýningunni í Genf í næsta mánuði og hefur hann fengið nafnið Kia Sportspace. Kia hefur engu að síður birt myndir af bílnum og þær ættu ekki að svekkja aðdáendur fagurra bíla.

Kia hefur sagt að þessi bíll sé arftaki Optima bílsins, en það vekur þó furðu að hér er kominn langbakur en Optima var einungis framleiddur með „sedan“-lagi, þ.e. með skott. Þessi nýi bíll er í D-stærðarflokki og er hannaður í hönnunarmiðstöð Kia í Frankfürt.

Kia segir að bíllinn sé hannaður sem „Grand Tourer“ en án þess að fórna aksturseiginleikum, sjálfbærni og sparneytni sem Kia er þekkt fyrir. Ekki kæmi á óvart ef bíllinn yrði boðinn í öflugri útgáfu, en það var ekki í boði með Optima bílinn og þótti mörgum það miður fyrir þann fagra bíl.

Nýi bíllinn er með útlitseinkenni Kia bíla, með nýrnagrillið á sínum stað og hreinar línur aftur eftir honum. Ekki er þó laust við að afturendi bílsins minni á Alfa Romeo 159 Sportwagon og er þar ekki leiðum að líkjast.