Gulli byggir tilnefndur: "Meira en bara sjónvarpssmiður“

„Þú ert í raun sá fyrsti sem hringir,“ segir Gunnlaugur Helgason, einnig þekktur sem Gulli byggir, húsasmíðameistari og dagskrárgerðarmaður. Þriðja sería þáttanna Gulli byggir hefur verið tilnefnd til Edduverðlauna sem besti þáttur í lífsstílsflokki. „Þetta er auðvitað stærsti flokkurinn og allt annað er bara upphitun fyrir hann,“ grínast hann með og hlær.

„Ef ég segi þér alveg eins og er þá átti ég ekki von á þessu fyrst að fyrri tvær seríurnar voru ekki tilnefndar,“ segir Gulli. Hann bætir þó við að þessi sé öðruvísi að því leiti að lokaniðurstaða hvers viðfangsefnis fyrir sig hafi fengist í lok hvers þáttar í stað lokaþáttarins.

Sjá einnig:Tilnefningar til Eddunnar 2015

Hann vill ekki gera upp á milli þáttaraðanna en segir þó sú nýjasta sé hraðari en þær sem á undan komu. Í upphafi hafi verið áætlað að þrír mánuðir færu í gerð þáttanna en þeir urðu á endanum níu talsins. „Það skilar sér í betra efni. Ég get alveg skilið hvers vegna ég var tilnefndur nú en ekki áður.“

„Við byrjuðum strax að tala um aðra seríu í kjölfar hinnar en útlit hennar veltur mikið á því hve mikinn tíma ég mun hafa,“ segir Gulli. Það sé ekki komið í ljós hvernig þáttaröðin muni verða eða hvenær hún verði tilbúin, það skýrist betur með tíð og tíma. Mögulega sé stefnt að því að hún komi strax í haust.

Sjá einnig:Þarf klikkaðan mann eins og mig í eitthvað svona

Þegar blaðamaður heyrði í Gulla var hann upptekinn við að henda rusli upp á kerru og fara með í Sorpu. „Það er eitt af því sem maður verður að gera þegar maður er í þessu. Ég hef oft lent í því þegar ég er að vinna að fólk stöðvar hjá mér, horfir á mig í smá stund áður en það segir; „Nú, ég hélt þú værir bara svona sjónvarpssmiður.““

„Ég er alveg í skýjunum með tilnefninguna, þú mátt hafa það eftir mér. Himinlifandi alveg hreint,“ segir Gunnlaugur að lokum.

Verðlaunaafhending Eddunnar fer fram 21. febrúar næstkomandi og verður í beinni útsendingu á Stöð 2 í opinni dagskrá.