Askja fagnar 10 ára afmæli

,,Þetta er stórt ár fyrir Öskju og við munum fagna þessum áfanga með ýmsum viðburðum á árinu. Við erum ákaflega stolt af því að vera umboðsaðili fyrir Mercedes-Benz og Kia. Bæði merkin hafa gert það mjög gott hjá okkur á undanförnum árum.

Mercedes-Benz er elsti bílaframleiðandi í heimi og er með gríðarlega sterka stöðu á lúxusbílamarkaði og er um leið stærsti framleiðandi atvinnubíla í heiminum. Þýski lúxusbílaframleiðandinn seldi fleiri bíla á síðasta ári en nokkru sinni áður í 128 ára sögu fyrirtækisins og hér á landi hefur Mercedes-Benz verið mest selda lúxusbílamerkið á undanförnum árum og jafnframt verið með gríðarsterka stöðu í flokki atvinnubíla, vörubíla og hópferðabíla. Þríhyrnda stjarnan er eitt verðmætasta vörumerki heims samkvæmt lista Interbrand's. Kia hefur unnið mjög mikið á hér á landi sem og víðast hvar í heiminum á undanförnum árum.

Kia er þriðji mest seldi bíllinn á Íslandi á síðasta ári sem er frábær árangur. Suður-kóreski bílaframleiðandinn hefur komið fram með nýjar línur á öllum bílum sínum á síðustu fjórum árum sem hafa slegið í gegn hvað varðar fallega hönnun og góða aksturseiginleika auk þess sem þeir eru sparneytnir og umhverfismildir. Þá er Kia með 7 ára ábyrgð sem er lengsta ábyrgð sem nokkur bílaframleiðandi býður upp á í heiminum," segir Jón Trausti Ólafsson, framkvæmdastjóri Öskju.

,,Framtíðin er björt hjá Öskju og við höfum fullan hug á að halda áfram metnaðarfullu og góðu starfi. Markmið fyrirtækisins er að vera í fararbroddi hvað varðar þjónustu til viðskiptavina og markaðssetningu þeirrar vöru sem fyrirtækið selur og þjónustar," segir Jón Trausti. Askja er til húsa í mjög vel búnu og glæsilegu húsnæði á Krókhálsi 11 rétt fyrir neðan golfvöllinn í Grafarholti. Þar er meðal annars að finna fullkomin bílaverkstæði, varahlutaþjónustu og rúmgóðan og bjartan sýningarsal fyrir Mercedes-Benz fólks- og atvinnubifreiðar og Kia fólksbifreiðar. Um 85 manns starfa hjá Öskju.