Módelin á bílasýningum fá 1.000 dollara á dag

Þeir sem sækja bílasýningar heimsins þekkja það að ekki eru bara fallegir bílar þar til sýnis heldur gjarnan fallegar konur sem standa við bílana. Þeim er ef til vill ekki mikil vorkunn því algeng laun þeirra eru 1.000 dollarar á dag eða um 130.000 krónur.

Ekki eru þær þar þó til óþurftar ef marka má grein frá bílavefnum Autoblog. Þar hermir að þeim sé ætlað að hlusta gaumgæfilega á hvað gestir sýningarinnar segja um þá bíla sem þær standa við. Í lok hvers sýningardags gefa þær svo skýrslu um umsagnir gestanna sem bílaframleiðendur nýta sér. Þær eru því ekki bara þarna uppá punt heldur safna þær mikilvægum upplýsingum fyrir framleiðendur.

Á síðustu árum hefur mikil gagnrýni gosið upp um veru þessara fríðu fljóða við bíla á bílasýningum og sýnist mörgum þær bæði vera til óþurftar og hreinlega móðgandi fyrir kvenþjóðina. Sumir aðstandendur bílasýninga hafa sett reglur um klæðaburð þeirra og á bílasýningum í Kína kemur til álita að banna tilvist þeirra á komandi bílasýningum.