Sergio Garcia fær hjálp úr óvæntri átt í Dubai

Sergio Garcia skipti um kylfusvein fyrir Thailand Golf meistaramótið sem fram fór á síðasta ári en kærasta hans, Katharina Boehm, var á pokanum þegar að hann sigraði mótið með fjórum höggum.

Garcia ætlar að reyna slíkt hið sama nú um helgina þegar að lokamót Evrópumótaraðarinnar fer fram í Dubai. Það er hins vegar ekki kærsta hans sem sér um að bera kylfurnar heldur fyrrum besti tennisleikari heims, Spánverjinn Juan Carlos Ferrero.

Ferrero sigraði á Opna franska meistaramótinu árið 2003 og fór í kjölfarið upp í efsta sæti á heimslistanum í Tennis. Hann sigraði alls á 16 stórum tennismótum á ferlinum en Garcia, sem er gamall vinur hans, sagði við fréttamenn að sigurhugarfar Ferrero geti hjálpað honum í Dubai.

„Við ræddum um þetta og hann var mjög spenntur fyrir því að prufa. Ég hef spilað golf með honum áður og það er aldrei slæmt að hafa góðan vin á pokanum. Katharina er sátt með að rölta með okkur og veita okkur stuðning úr fjarlægð.“

DP World Tour Championship er einn stærsti viðburður Evrópumótaraðarinnar ár hvert en aðeins 60 stigahæstu kylfingar hennar hafa þátttökurétt. Verðlaunafé er einnig gríðarlega hátt sem og bónusgreiðslur til þeirra kylfinga sem í það komast.

Margir af bestu kylfingum heims taka þátt, meðal annars Rory McIlroy sem snýr aftur á golfvöllinn eftir nokkurra vikna hlé. Allir dagarnir verða í beinni útsendingu á Golfstöðinni og hefst útsending frá fyrsta hring klukkan 08:00 í fyrramálið.