Sjóbirtingurinn er mættur í Varmá

Þessa dagana er sjóbirtingsveiðin að komast í gang en nokkuð stór hópur veiðimanna sneiðir framhjá laxveiði til að einbeita sér að sjóbirtingnum.

Það er mikil og góð sjóbirtingsveiði víða á Íslandi og þær ár sem mætti nefna nálægt Reykjavík sem eiga ágæta stofna eru t.d. Laxá í Kjós, Brynjudalsá, Korpa og svo auðvitað litla perlan í Hveragerði, Varmá, en hún hefur lengi notið mikilla vinsælda og það ekki að ósekju því í hyljum hennar liggja stórir fiskar.

Hrafn Hauksson fór í Varmá í gær og gerði fantaveiði, hann skrapp eftir hádegi og setti í 12 fiska en náði 5 á land. Þeir sem komu á land voru 50-73 cm og þeir sem hann missti voru á því bili líka, nema einn sem hann missti sem hann telur að hafi verið mun stærri. Mikið líf í öllum hyljum, hann varð var við fiska á öllum stöðum nema 3 hyljum sem hann kastaði í.

Sérstaklega var þetta gott þegar fór að dimma, stór Kolskeggur og það varð allt vitlaust þegar hann fór útí. Hann setti í 4 á síðasta hálftímanum náði einum 66cm en missti hina.  Allir fiskarnir voru hrikalega vel haldnir, spikfeitir og sérstaklega þessi stærsti. Menn eru að sjá mikið af fiski á efri svæðunum í ánni, í kringum Frost og Funa og í kringum golfvöllinn. Þannig að það virðist vera nóg af fiski í ánni.