McIlroy í bílstjórasætinu á Valhalla þegar PGA-meistaramótið er hálfnað

Norður-Írinn Rory McIlroy leiðir á PGA-meistaramótinu sem fram fer á Valhalla en hann er samtals á níu höggum undir pari eftir tvo hringi. Hann kom inn á 67 höggum í erfiðum aðstæðum í gær eða fjórum höggum undir pari.

Það eru þó mörg stór nöfn sem koma til með að þjarma að McIlroy yfir helgina en Jim Furyk og Jason Day deila öðru sætinu á átta höggum undir pari. Þá er Rickie Fowler á sjö höggum undir pari ásamt Ryan Palmer og Finnanum Mikko Ilonen en Phil Mickelson kemur þar á eftir á sex höggum undir pari ásamt fleirum.

Hrakfarir Tiger Woods héldu áfram í gær en hann kom inn á þremur höggum yfir pari og endaði mótið á sex yfir. Hann var töluvert frá því að ná niðurskurðinum og óvíst er hvort að Woods muni keppa meira í ár enda virtust bakmeiðslin sem hann varð fyrir í síðustu viku enn plaga hann.

Fleiri þekktir kylfingar náðu ekki niðurskurðinum er þar ber helst að nefna Webb Simpson, Martin Kaymer, Miguel Angel Jimenez og ungstirnið Jordan Spieth.

Sýnt verður beint frá þriðja hring á Golfstöðinni í kvöld og hefst útsending klukkan 18:00.