Fínar göngur af laxi í Brynjudalsá

Þrátt fyrir að litlar göngur séu í sumar árnar á vesturlandi er ein lítil á í Hvalfirði sem virðist ekki fylgja neinum lögmálum um laxgengd.

Brynjudalsá hefur á árum sem hafa verið kölluð róleg staðið sig með prýði og haldið nokkuð góðri veiði á sínar tvær stangir en algengt er að áin skili 150-250 löxum á ári á aðeins tvær stangir.  Nú er eingöngu veitt á flugu og hefur það ekkert breytt veiðitölum af neinu ráði því eftir að laxastiginn við Efri Foss var lagaður stoppar laxinn minna á þeim veiðistað og fer beint upp á efri svæðin sem eru sérstaklega skemmtileg flugusvæði en þar hefur þó lengi aðeins verið leyft að veiða á flugu.  Ásamt góðri laxgengd er nokkuð af sjóbirting farið að sýna sig í ánni en það er vel þekkt að veiðimenn geta gengið fram á stórar torfur af vænum sjóbirting á efri svæðunum og oft mjög væna fiska.  Í rigningartíðinni sem hefur verið að ganga yfir hefur áin oft vaxið mikið en er núna í frábæru vatni sem gerir laxinn tökuglaðann með eindæmum.  Það verður spennandi að sjá hvað gengur í ánna á næsta straum en hún er vel þekkt fyrir að fá oft góðar síðsumarsgöngur.