7 komnir á land á fyrstu vakt í Laxá í Kjós

Veiði hófst í Laxá í Kjós í morgun og það er óhætt að segja að áin hafi staðið fyllilega undir væntingum á fyrstu vaktinni.

Fyrstu laxarnir sáust í Laxá fyrir um mánuði síðan en það er eitthvað sem gerist svo til árlega í ánni.  Veiði hófst í morgun og það ekki langan tíma að setja í fyrsta laxinn en þegar morgunvaktinni lauk voru 7 laxar komnir á land og nokkir sluppu.  Laxar veiddust á öllum svæðum en mest veiddist á neðsta svæðinu eins og gera mátti ráð fyrir.  Nokkuð vatn er í ánni og hún er örlítið lituð en það kom ekki að sök.  Aðeins einn smálax kom á land en allir hinir laxarnir sem veiddust voru 73-83 sm.  Næsta á innan vébanda Hreggnasa sem opnar er Grímsá en þar hafa laxar sést og það fyrir nokkru svo það má gera ráð fyrir því að nokkuð líf verði í opnun þar.  Laxá í Kjós er annars að sögn leigutaka svo til uppseld utan þess að ein eða tvær stangir voru lausar í lok sumars.