Úr 12:00 á PoppTV

„Þessi þáttur verður bara svona almenn vitleysa og gaman,“ segir hinn tvítugi Egill Ploder en Egill og tveir félagar hans, þeir Róbert og Nökkvi, verða með skemmtilega þætti á PoppTV öll föstudagskvöld kl. 20 í sumar. Fyrsti þátturinn fer í loftið í kvöld og ber hann einfaldlega heitið Áttan.

„Þetta er í fyrsta skipti sem við erum að taka upp í setti, sem er smá breyting frá sketsunum sem við vorum að taka upp áður,“ segir Egill, en þremenningarnir voru allir í sketsaþáttunum 12.00 í Verzló.

„Við komum til með að fá góða gesti til okkar í stúdíóið, verðum með ýmsar gestaþrautir og í lok hvers þáttar verður tónlistaratriði.“ Hann segir þá félaga einstaklega spennta fyrir kvöldinu.

„Við erum búnir að vera að vinna mikið í kringum klippið á þáttunum og fleira en það verður allt öðruvísi að sjá þetta á skjánum. Við hlökkum mikið til og ætlum að hittast og grilla saman og horfa á fyrsta þáttinn í kvöld. Það er svo vonandi að áhorfendur fíli þetta líka.“