Átta japanskir bílaframleiðendur sameinast um framleiðslu véla

Samvinna tveggja eða fleiri bílaframleiðenda er ekki óþekkt nú til dags, en óvanalegt er að 8 bílaframleiðendur frá einu landi sameinist um þróun véla. Það eru framleiðendurnir Toyota, Honda, Mazda, Nissan, Subaru, Mitsubishi, Suzuki og Daihatsu sem ætla saman að þróa vélar sem eiga að verða 30% sparneytnari en vélar þeirra í dag.

Þarna eru svo til allir bílaframleiðendur Japans upptaldir og því er þetta verkefni svo gott sem landsátak bílgreinarinnar í sparneytni. Þessi þróun snýr bæði að framleiðslu bensín- og dísilvéla og er fjármögnuð að hálfu frá framleiðendunum og hálfu frá japanska ríkinu.

Samtals hefur verið lagt 20 milljón dollarar til verksins, en talsvert langt er í að sjáist til afraksturs þess. Miðað er við að fyrstu vélarnar sem koma út úr þessu þróunarverkefni verði af árgerð 2020, en horft er í fyrstu til 10 ára verkefnis, eða til ársins 2024.

Eitt af markmiðum þeim sem bílaframleiðendurnir hafa sett sér er að nýta orku bæði bensíns og dísilolíu mun betur en nú er gert. Í dag nýta vélar um 39% af orku bensíns og 42% af orku dísilolíu, en markmiðið er að ná þessari tölu í 50% fyrir báðar gerðir.