Elliðavatn opnar á fimmtudag

Veiði hefst í Elliðavatni á fimmtudaginn og það má eins og venjulega reikna með fjölmenni við vatnið á fyrsta veiðideginum.

Aðstæður líta mjög vel út hvað veður varðar en það er spáð sólskini á morgun og hinn sem á eftir að valda því að vatnið hitnar aðeins.  Það eru einmitt bestu skilyrðin fyrir klak á púpu.  Á fimmtudaginn er síðan spáð skýjuðu veðri og 3-5 metrum á sekúndu sem er afbragðs veður til að veiða á flugu.  Það smá þess vegna reikna með að það verði mikið líf í vatninu og veiðin samkvæmt því góð.  Urriðinn í Elliðavatni er oft mjög tökuglaður og fyrir þá veiðimenn sem eru að taka sín fyrstu skref við vatnið á fimmtudaginn má benda á að nota litlar straumflugur og svartar púpur í stærðum #14-#16.  Þegar líður á sumarið veiðist líka vel á þurrflugu.  hvað varðar val á veiðistað fyrsta daginn er vinsælt að vera við Elliðavatnsbæinn en eins má benda á að veiða Heiðmerkurmegin en t.d. við Þingnes er oft mikið af urriða fyrst á tímabilinu.