Ben Martin með glæsilegt vallarmet á fyrsta hring á Zurich Classic

Zurich Classic hófst í gær en mótið er hluti af PGA-mótaröðinni og fer fram á hinum fallega TPC Louisiana velli. Aðstæður til þess að skora vel voru góðar sem sást best á því að eftir fyrsta hring eru alls 82 kylfingar undir pari. Best allra lék Bandaríkjamaðurinn Ben Martin en hann fór á kostum á fyrsta hring og bætti vallarmetið á TPC Louisiana um tvö högg með því a leika á 62 höggum eða 10 undir pari.

Í öðru sæti er landi hans Andrew Swobola en hann kom inn á átta höggum undir pari og Suður-Kóreumaðurinn Seung Yul-Noh og Svíinn Peter Hanson eru jafnir í þriðja sæti á sjö höggum undir pari.

Þrátt fyrir mörg góð skor í gær voru ekki allir sem áttu sinn besta dag en ungstirnið Rickie Fowler var meðal þeirra. Hann lék á 75 höggum eða þremur yfir pari og er meðal neðstu manna. Daninn Thornbjorn Olesen gerði slíkt hið sama og ljóst er að þeir þurfa að taka sig á í dag til þess að komast í gegn um niðurskurðinn.

Annar hringur fer fram í dag og verður í beinni útsendingu á Golfstöðinni frá 19:00. Það er þó ekki eina golfið sem verður í beinni útsendingu í kvöld en klukkan 22:30 tekur við útsending frá Swinging Skirts kvennamótinu sem er hluti af LPGA mótaröðinni.