Hraðaheimsmet á sláttutraktor

Mörg eru undarlegu heimsmetin og eitt þeirra var sett um daginn á Spáni er sláttutraktor frá Honda náði 187 km/klst meðalhraða á 100 metra kafla sem mældur var. Þurfti traktorinn reyndar að fara í báðar áttir til að heimsmet væri skráð og meðalhraði beggja ferða gildir sem metið.

Fyrra metið var með þessu slegið hressilega, en það var 141 km/klst. Það met var sett í Top Gear þáttunum í minnisstæðum þætti. Sláttutraktorinn sem nú á metið er með 1.000 cc V-twin mótorhjólavél úr Honda VTR Firestorm mótorhjóli og er hann 109 hestöfl. Til samanburðar eru nú fjórar gerðir Honda slátturtraktora til sölu hjá Bernhard, söluaðila Honda á Íslandi, og eru þeir 11-20 hestöfl.

Sláttutraktorinn öflugi er aðeins 4 sekúndur í hundraðið. Gírskiptingar fara fram með takka í stýri. Sérhönnuð fjöðrun er á gripnum og undir honum eru ATV hraðakstursdekk. Þessi traktor er samt enn fær um að slá gras eins og honum var upphaflega ætlað og það gerir hann á 25 km hraða, helmingi hraðar en hefðbundinn slíkur traktor.

Sjá má þennan öfluga sláttutraktor setja metið á Spáni í myndskeiðinu.