Spennandi lokadagur framundan á Kraft Nabisco meistaramótinu

Mikil spenna er fyrir lokahringinn á fyrsta risamóti ársins í kvennagolfinu sem fram fer á hinum glæsilega Mission Hills velli í Kaliforníu. Efstar í fyrsta sæti eru Michelle Wie og Lexi Thompson en þær eru báðar á tíu höggum undir pari. Jafnar í þriðja sæti eru þær Se Ri Pak og Carley Hull á átta höggum undir en margir þekktir kylfingar eru þar á eftir sem gætu blandað sér í baráttuna um sigurinn með góðum hring í dag. Þar má helst nefna Cristie Kerr sem er sex undir, Shanshan Feng á fimm höggum undir og Stacy Lewis á fjórum höggum undir pari.

Eitt er víst að það verður spennandi að fylgjast með lokahollinu í kvöld en Michelle Wie og Lexi Thompson eru meðal vinsælustu kvenkylfinga heims. Wie hefur unnið tvisvar á LPGA mótaröðinni á átta ára atvinnumannaferli sem þykir ekki mikið miðað við hversu efnileg hún þótti þegar að hún kom fyrst fram á sjónvarsviðið sem unglingur.

Þá er oft talað um Lexi Thompson sem framtíð kvennagolfsins en þrátt fyrir að vera nýorðin 19 ára gömul hefur hún sigrað fjögur stór mót, það fyrsta á LPGA-mótaröðinni 16 ára gömul. Þá var hún einnig yngsti kvenkylfingurinn í sögunni til þess að vinna sér þátttökurétt á Opna bandaríska meistaramótinu í golfi, þá aðeins 12 ára.

Sýnt verður beint frá lokahringnum á Golfstöðinni í kvöld og hefst útsending klukkan 22:00.