Jón Jónsson gefur út lag í minningu frænda síns

21. febrúar 2014 20:00

Tónlistarmaðurinn Jón Jónsson hefur gefið út lagið Sakna þín í minningu frænda síns, Hermanns Fannars Valgarðssonar, sem lést langt fyrir aldur fram í nóvember árið 2011. Allur ágóði af laginu rennur í LUV-sjóðinn, minningarsjóð um Hermann Fannar.

Lagið kom upphaflega út á plötu Jóns, Wait for Fate, árið 2011 undir heitinu Miss you. Nú gefur Jón það hins vegar út á íslensku.

LUV-sjóðurinn var stofnaður til minningar um Hermann Fannar. Markmið sjóðsins er að styðja við bakið á góðum málefnum. Hópurinn á bak við sjóðinn hefur staðið fyrir ýmsum uppákomum á síðustu árum meðal annars risatónleikum í Kaplakrika árið 2011, í samstarfi við X-ið 977, þar sem margar af frægustu hljómsveitum landsins stigu á stokk.

LUV-sjóðurinn hefur meðal annars styrkt Hjartaheill og Barnaspítala Hringsins. Í ár mun sjóðurinn styrkja Ljónshjarta, stuðningsfélag fyrir ekkjur, ekkla, börn þeirra og aðstandendur.

Hægt er að nálgast lagið hér en lagið kostar litlar 499 krónur.

Tónlist