Hyundai Genesis gegn þýskum

Hingað til hefur Hyundai teflt fram Genesis lúxusbíl sínum á Bandaríkjamarkaði. Breyting verður á því í ár þar sem hann verður einnig í boði í suðurhluta Evrópu, sem og í Tékklandi og Slóvakíu. Þar á hann að keppa við bíla þýsku lúxusbílaframleiðendanna.

Samkeppnisbílar Hyundai Genesis eru helst BMW 5-línan, Mercedes Benz E-Class og Audi A6. Þýsku framleiðendurnir eru með um 80% hlutdeild á þessum markaðssvæðum sem Hyundai ætlar nú með Genesis á og það gæti reynst þrautin þyngri að vinna sér markað gegn þeim þýsku. Því eru áætlanir Hyundai hógværar er kemur að því magni bíla sem þeir áætla að selja, eða aðeins 1.000 bílar alls í Evrópu fyrsta árið.

Hyundai hefur hingað til ekki verið þekkt fyrir framleiðslu lúxusbíla og því ætlar Hyundai að treysta á þann kúnnahóp sem átt hefur Hyundai bíla áður og þekkja þá af góðu. Ekki er ljóst á hvaða verði Genesis verður boðinn en víst er að Hyundai verður að verðleggja hann neðar en bíla þýsku framleiðendanna.

Heildarmarkaðshlutdeild Hyundai í Evrópu er 3,4% en stefna Hyundai er að auka hana í 5% árið 2020. Hlutdeild Hyundai í janúar féll um 5,5% og ef til vill er tilkoma Genesis í Evrópu liður í því að snúa þessari þróun við. Í Evrópu eru nú 6 milljónir Hyundai bíla og 70% þeirra eru yngri en 7 ára. Þeir sem kaupa Hyundai bíla nú í Evrópu eru í 50% tilvika fyrrum Hyundai eigendur, en sú tala var 36% fyrir 4 árum.