Fjórir ólympíuhringir fín Audi auglýsing

Mikið hefur verið grínast með ólympíuhringinn sem ekki opnaðist á opnunarhátíðinni í Sochi. Gárungarnir hafa haft í flimtingum að þarna hafi verið á ferð hin fínasta ókeypis auglýsing fyrir Audi, sem öll heimsbyggðin sá, en merki Audi samanstendur einmitt af fjórum hringjum.

Audi fyrirtækið hefur ekki séð ástæðu til að nýta sér þessa leiðu bilun sem leiddi til þess að fimmti hringurinn opnaðist ekki. Er það af skiljanlegum ástæðum, en það þætti ef til vill ekki svo vinsæll gjörningur að eigna sér 80% af sjálfum ólympíuhringjunum heilögu.

Það hefur þó ekki komið í veg fyrir að einhver grínistinn hannaði auglýsingu þar sem Audi nýtir sér það að síðasti hringurinn opnaðist ekki og sést hún hér. Þar stendur "When four rings is all you need".