Ólafur Lofts: Fékk kjarnorkupar á síðustu holunni

Kylfingurinn Ólafur Loftsson er að keppa á opna Orlando-golfmótinu á Fore The Players mótaröðinni og komst í gegnum niðurskurðinn í nótt.

Ólafur er í 17. sæti fyrir lokahringinn á mótinu og er hann nú átta höggum á eftir efstu mönnum. Ólafur fékk þrjá fugla á síðustu níu holunum í nótt.

„Spilaði fyrstu tvo hringina á 72 (+2) og 69 (-1) höggum, er samtals á einu höggi yfir pari. Það hefur vantað aðeins upp á hjá mér þessa hringi en ég datt í gírinn á seinni 9 holunum í dag og ég komst naumlega í gegnum niðurskurðinn. Fékk mikilvægt kjarnorkupar á síðustu holunni áðan til að koma mér í gegn," sagði Ólafur á fésbókarsíðu sinni.

Ólafur er bjartsýnn fyrir lokahringinn á mótinu. „Það er aðeins ein leið hjá mér og hún er upp töfluna. Ég hef verið að vinna í mörgum atriðum undanfarið og það hefur verið gott að prófa það í þessu móti. Þessi völlur hentar mér frábærlega og ætla ég að sýna það og sanna á morgun," skrifaði Ólafur ennfremur inn á fésbókarvegginn sinn.