Enn minni jepplingur frá Volkswagen

Bílaframleiðendur keppast við að bjóða smáa jepplinga en svo virðist sem mikil eftirspurn sé eftir þannig bílum nú um stundir. Volkswagen hefur haft í sölu Tiguan jepplinginn til nokkurs tíma, en í bígerð er enn minni jepplingur sem fengið hefur nafnið Taigun.

Þessi bíll var fyrst sýndur sem hugmyndabíll í október á árið 2012 á bílasýningu í Sao Paulo í Brasilíu. Hann mun sjást aftur nær endanlegri útfærslu bílsins á bílasýningu í Nýju Delí í Indlandi bráðlega.

Bíllinn er með smárri 1,0 lítra forþjöppudrifinni dísilvél, 108 hestöfl og verður mjög sparneytinn. Eyðsla bílsins verður 4,7 lítrar á hverja 100 kílómetra. Hann er samt enginn aumingi og kemst í hundraðið á 9,2 sekúndum og er með hámarkshraðann 185 km/klst.

Bíllinn mun aðeins fást með 6 gíra beinskiptingu, væntanlega til að halda niðri verði hans. Hann er mjög léttur, eða aðeins 995 kíló. Volkswagen segir að þrátt fyrir að bíllinn sé í smærra lagi sé bæði höfuð- og fótarými í bílnum yfrið.

Það er ástæða fyrir því að bíllinn verður sýndur í Indlandi en Volkswagen ætlar honum stóra hluti þar í landi og mun líklega fyrst setja hann á markað þar. Ekki er ljóst hvenær framleiðsla hefst á Volkswagen Taigun.