Audi Allroad Shooting Brake eyðir 1,9 lítra

Audi ætlar að sýna gestum bílasýningarinnar í Detroit, sem hefst í þessari viku, inní framtíðina með afar tæknivæddum bíl. Hann hefur fengið nafnið Audi Allroad Shooting Brake og er á margan hátt sérstæður.

Fyrir það fyrsta eyðir hann bara 1,9 lítra á hverja 100 kílómetra þó hann sé alger spyrnukerra sem kemst á hundrað kílómetra hraða á 4,6 sekúndum. Hann getur farið fyrstu 50 kílómetrana á rafmagni og rafmótorar bílsins eru mjög öflugir, 300 kW og fá orku frá 8,8 kWh lithium-ion rafhlöðum. Rafmótor er við hvert hjól bílsins, en með 2,0 lítra brunavél er afl bílsins 408 hestöfl og togið 650 Nm.

Hann er frekar léttur miðað við stærð, eða 1.600 kíló enda talsvert ál og koltrefjar í bílnum. Innanrými Audi Allroad Shooting Brake er æði framúrstefnulegt og mælaborðið minnir meira á flugvél en bíl. Audi segir að í þessum bíl geti fólk séð inní framtíðarsmíð Audi og hvers sé að vænta frá fyrirtækinu.