Raunsæ saga um forboðna ást

Bíó: Frjálst fall / Freier Fall

Leikstjóri: Stephan Lacant, Leikarar: Hanno Koffler, Max Riemelt, Katharina Schüttler.

RIFF kvikmyndahátíð

Kvikmyndin Frjálst fall segir frá Marc sem hyggur á frama innan óeirðalögreglunnar og á von á sínu fyrsta barni með sambýliskonu sinni. Í lögregluskólanum kynnist hann Kay og takast með þeim ástir. Tilfinningarnar sem bærast innra með Marc eru honum framandi og á hann í erfiðleikum með að takast á við þær. Hann er neyddur til þess að horfast í augu við sannleikann og í kjölfarið upplifir hann sjálfan sig í frjálsu falli.

Söguþráður myndarinnar minnir um margt á söguþráð Brokeback Mountain; tveir karlmenn sem lifa í einkar karllægum heimi kynnast og falla hvor fyrir öðrum. Myndin er raunsæ og tilfinningarík og þótti undirritaðri leikkonan Katharina Schüttler sýna stórleik í henni. Aðalleikararnir tveir eru einnig góðir, en bíóunnendur gætu kannast við Riemelt úr kvikmyndinni Die Welle.

Niðurstaða: Raunsæ og tilfinningarík kvikmynd frá þýska leikstjóranum Stephan Lacant sem vert er að kíkja á.