Poulter auglýsir eftir nýjum pútter á Twitter

Englendingurinn Ian Poulter ætlar að skipta um pútter eftir að kylfingurinn hafnaði í 25. sæti á Opna franska meistaramótinu um síðustu helgi.

Kylfingurinn vill ekki meina að slæmt gengi sé alfarið pútternum að kenna en Poulter ætlar samt sem áður að vera með nýja kylfu í pokanum á næsta stórmóti en Opna breska meistaramótið hefst eftir viku.

Poulter fer óhefðbundnar leiðir í því að auglýsa eftir nýjum pútter en hann setti inn auglýsingu á samskiptamiðlinum Twitter þar sem hann fór þess á leit við kylfuframleiðendur að senda sér nýjan pútter til þess að prófa.

„Ég hef núna ákveðið að reka pútterinn minn og ætla mér að finna nýjan fyrir opna breska. Kylfuframleiðendur mega því endilega senda mér púttera á skrifstofu IJP [Ian James Poulter]. Ég vil ekki kenna pútternum um slæmt gengi en ég vil samt sem áður prófa nýja kylfu,“ skrifaði Poulter á Twitter-síðu sinni.

Ian Poulter hefur að undanförnu notað pútterinn Odyssey XG númer sjö.

„Breytingar eru oft góðar í golfi. Það hefur hentað mér vel á ferlinum að skipta um kylfur. Stundum þarf maður bara að sjá eitthvað nýtt þegar maður lítur niður. Það er komin tími á hvíld fyrir gamla pútterinn,“ sagði Poulter.

Það má fastlega gera ráð fyrir því að kylfingurinn eigi eftir að fá þónokkuð marga púttera senda á skrifstofuna og hann verður líklega kominn með nýja kylfu þegar Opna breska meistaramótið hefst þann 14. júlí á Muirfield-vellinum.