Mæta með kvennalið árið 2014

ÍR-ingar hafa stofnað meistaraflokk kvenna hjá félaginu á nýjan leik. Liðið mun leika í utandeildinni á næsta tímabili en stefnt er á að tefla fram liði í efstu deild frá og með haustinu 2014.

„Eiginlega allar okkar stelpur eru á yngsta ári í 3. flokki. Okkur þótti fulldjarft að ætla þeim að keppa við Fram og Val í haust en stefnan er að vera með lið í N1-deildinni eftir ár,“ segir Runólfur Sveinsson, formaður handknattleiksdeildar ÍR.

ÍR tefldi síðast fram kvennaliði í meistaraflokki veturinn 2010-2011. Þá lék liðið í næstefstu deild og hafnaði í 6. sæti af ellefu liðum.

„Þá ætluðum við af stað en gerðum mistök. Við neyddumst til að hætta strax aftur. Við teljum okkur hafa lært af því ári og ætlum því rólega af stað í þetta skiptið,“ segir Runólfur.

Fjölmargar handknattleikskonur í fremstu röð hér á landi spiluðu með ÍR í yngri flokkum. Má nefna Dagnýju, Drífu og Hrafnhildi Skúladætur og Guðrúnu Hólmgeirsdóttur í því samhengi.

„Við erum að vinna í því að tala við uppaldar ÍR stelpur sem eru hér og þar. Það er fullt af frambærilegum handboltakonum sem hafa alist upp í ÍR,“ segir Runólfur.

Hann segir jákvæðan anda ríkja um markmið félagsins en ekki sé búið að ganga frá neinu. Ekki liggur ljóst fyrir hve mörg lið munu leika í efstu deild kvenna á næstu leiktíð. Víkingur stefnir á að senda lið og sömu sögu er að segja um sameiginlegt lið Þórs og KA frá Akureyri. Fjölnir tefldi fram ungu liði í utandeildinni í vetur en stefnir ekki á þátttöku í deildarkeppninni fyrr en haustið 2017.