Kúbumenn geta loks keypt bíla

Í 50 ár hefur íbúum á Kúbu verið bannað að kaupa nýja bíla, en nú hefur Raul Castro aflétt þessu banni. Þetta bann hefur orðið til þess að á Kúbu er líklega elsti og athyglisverðasti bílafloti nokkurs lands.

Þó svo banninu hafi nú verið aflétt er ekki eins og götur Kúbu muni fyllast af nýjum bílum á næstu dögum. Ástæða þess er sú að afar fáir íbúar Kúbu hafa efni á að kaupa sér reiðhjól, hvað þá bíl. Svo illa er farið fyrir þessu kommúnistaríki og hætt við því að bíleigendur þar verði áfram um sinn að gera við sína 50 ára og eldri bandarísku bíla sem hanga flestir saman á límbandi og góðri trú.

Engu að síður er aflétting bannsins fagnaðarefni fyrir íbúa Kúbu og aldrei að vita nema það sé með fyrstu skrefum til að færa meira frjálsræði í athafnir og viðskipti eyjaskeggja.