Bílar

Sala nýrra bíla á Spáni eykst vegna aðgerða ríkisstjórnarinnar

Finnur Thorlacius skrifar
Þeim fjölgar nú nýju bílunum á spænskum vegum.
Þeim fjölgar nú nýju bílunum á spænskum vegum.
Sala á nýjum bílum á Spáni jókst um 15% í nóvember sl. en alls voru nýskráðir  55.450 fólksbílar þar í landi. Spænska bílgreinasambandið Anfac þakkar því sérstökum aðgerðum ríkisstjórnarinnar þar í landi til að fækka gömlum, óöruggum og mengandi bílum í umferð. Aðgerðirnar eru kallaðar ,,bílaförgun með aðstoð stjórnvalda“.

Sala á nýjum bílum á Spáni í október jókst um 34% vegna þessara aðgerða en eftirgjöf er á gjöldum ef 7-10 ára gömlum bíl er fargað og nýr sparneytnari bíll keyptur í staðinn.  Haft er eftir Soraya Saenz de Santamaria, aðstoðarforsætisráðherra Spánar, að þetta sé í þriðja sinn sem þessi leið sé farin á stuttum tíma og að hún hafi skilað út 300.000 gömlum, eyðslufrekum bílum í stað nýrri og sparneytnari bílar. Aðgerðirnar miða að því að auka hagvöxt í landinu og koma til móts við almenning og auðvelda fólki að skipta í nýjan bíl.

Á fyrstu 11 mánuðum ársins hefur bílasala aukist um 2%, en alls hafa verið nýskráðir 662.188 bílar að sögn spænska bílgreinasambandsins  og er reiknað með að fjöldinn verði kominn í 720.000 þegar árið er liðið. Þess má geta að meðalaldur fólksbíla hér á landi er kominn yfir 12 ár og eldist enn frekar enda um 5,4% samdráttur í nýskráningum á fyrstu 11 mánuðum ársins samanborðið við sama tímabil ársins 2012.

Mest lesið




×

Mest lesið