Mazda3 hlýtur nýsköpunarverðlaun Motor Press Guild

Nýr Mazda3, sem frumsýndur var hjá Brimborg í byrjun mánaðar, hlaut í gær nýsköpunarverðlaun Motor Press Guild, sem eru stærstu samtök bílablaðamanna í Bandaríkjunum. 

Dómnefndin var skipuð bæði bílablaðamönnum og sérfræðingum og voru afhent verðlaun í tveimur flokkum. Mazda3 hlaut verðlaun í undir 29.000 dollara flokknum og Chevrolet Corvette Stingray í flokknum yfir 29.000 dollara.

Við val á bílunum var tekið mið af aksturseiginleikum, verði, hönnun og tækni. Þess má geta að Mazda3 er einnig í forvalinu fyrir Bíl ársins í Bandaríkjunum (North American Car of the Year) en úrslit verða tilkynnt í janúar. 

SKYACTIV spartæknin á stóran þátt í þessum verðlaunum en SKYACTIV er heiti á nýrri framleiðslutækni Mazda sem tekur til nýrra véla, nýrra sjálf- og beinskiptinga og ekki síður til nýrrar byggingartækni þar sem notað er meira af hástyrktarstáli í burðarvirkið sem veitir hönnuðum Mazda svigrúm til að minnka þyngd.

Nýju SKYACTIV vélarnar eru með sérstaklega lágu innra viðnámi og bensínvélin er með hæsta þjöppuhlutfalli sem þekkist í fjöldaframleiddri vél eða 14:1. Þetta skilar hreinni bruna og betri nýtingu á eldsneytinu.