Bílar

Fleiri sportbílar frá Skoda

Finnur Thorlacius skrifar
Skoda Octavia RS
Skoda Octavia RS
Síðustu fréttir úr herbúðum Skoda eru á þann veg að sportlegum bílum frá tékkneska framleiðandanum muni fjölga á næstunni. Skoda hefur í nokkurn tíma framleitt Octavia RS og Fabia vRS sportbílana. Heyrst hefur að Skoda vinni nú að sportlegum jepplingi sem hvorki verður hár frá vegi né til þaksins.

Einnig segja raddir að von sé á Octavia bíl með coupe-lagi sem verður álíka sportlegur bíll og Volkswagen CC. Á bílasýningunni í Frankfürt, sem nú stendur yfir, var forstjóri Skoda, Dr. Vahland, spurður að því hvort vænta mætti fleiri sportlegra bíla og af viðbrögðum hans að dæma má einmitt eiga von á því.

Skoda hefur að mestu látið systurfyrirtæki sín, Volkswagen og Audi, um sviðið í formi tvinnbíla og hreinna rafmagnsbíla. Þó er á prjónunum að bjóða Plug-In-Hybrid Skoda bíl, en nokkuð er í að svo verði.

Skoda virðist því ætla að halla sér fremur í áttina að sportlegri bílum í bili og láta hinum fyrirtækjunum í Volkswagen stórfjölskyldunni um þróun umhverfisvænna bíla sem byggja á nýrri tækni, en bæta henni svo í vörulínu sína þegar reynsla er komin á tæknina.

Mest lesið




×

Mest lesið