Guðmundi Steingríms bolað út úr sínu eigin máli

Guðmundur Steingrímson,formaður Bjartrar Framtíðar, var upphafsmaður að svokölluðu NPA máli á Alþingi.

NPA stendur fyrir notendastýrð persónuleg aðstoð og felst í því að fólk með sértækar þjónustuþarfir vegna skertrar færni, til dæmis alvarlegrar hreyfihömlunar, stjórni því sjálft hvers konar stoðþjónustu það nýtur.

Málið er Guðmundi mikið hjartans mál og hann er því bæði vonsvikinn og undrandi yfir því að Eygló Harðardóttir, félagsmálaráðherra hafi tilkynnt honum símleiðis í gær að hann væri ekki lengur formaður verkefnisstjórnarinnar þar sem hún ætli að skipa nýjan formann.

„Ég vona að Eygló taki boltann og klári verkefnið, það er í lögum að NPA eigi að vera lögfest þjónustuform fyrir fatlað fólk í lok næsta árs og það verður að standast. Ég vona að Eygló skilji hvað við erum að tala um.“ Sagði Guðmundur Steingrímsson í Harmageddon í morgun. Hægt er að hlusta á viðtalið hér að ofan.