Smart Fortwo fyrir 16.400 kr. á mánuði

Það er ekki dýrt að leigja hinn smáa rafmagnsbíl Smart Fortwo Elecrtic Drive í Bandaríkjunum en Smart býður nú 139 dollara leiguverð á mánuði, eða 16.400 krónur. Er leigan á rafhlöðum bílsins innifalin.

Leigan er til 3 ára og ekki má aka bílnum lengra en 48.300 km á tímabílinu, en það gerir 16.100 km á ári og ætti að duga flestum. Þetta leiguverð er jafnt því verði sem leigutakar þurfa að greiða fyrir venjulegan Smart Fortwo bíl, sem þó er talsvert ódýrari í framleiðslu en rafmagnsútgáfa hans.

Smart býður að auki þeim bílasölum sem leigja út bílinn 2.000 dollara greiðslu fyrir hvern bíl sem þeir geta ráðstafað að vild, til auglýsinga eða til enn meiri lækkunar á leigu- eða kaupverði.

Er þessi aðgerð Smart, sem er í eigu Daimler Benz, til marks um þá tilhneigingu þeirra bílaframleiðenda sem framleiða rafmagnsbíla að lækka þá hressilega þessa dagana til að fjölga þeim verulega á götunum.