Svarta boxið í öllum bílum árið 2014

Það eru ef til vill ekki margir sem vita að svart box sem skráir akstur bíla leynist undir mælaborði flestra nýrra bíla í dag og þau verða í öllum bílum árið 2014 í Bandarikjunum. Segja má að þetta sé enn ein birtingarmynd þess að "stóri bróðir" sé sannarlega að fylgjast með ferðum okkar allra.

Í dag eru 96% allra nýrra bíla sem framleiddir eru þar vestra með svona svart box. Það er bílaöryggisstofnunin í Bandaríkjunum (NHTSA) sem fer fram á að þessi búnaður verði að vera í öllum bílum frá og með næsta ári.

Fyrstu bílarnir með þessum búnaði voru framleiddir af General Motors árið 1990 í því augnamiði að fylgjast með gæðum bíla sinna með tilliti til aksturs þeirra. Svarta boxið í bílum skráir ekki eins miklar upplýsingar og í flugvélum, en skráningarbúnaður sýnir hraða bíla, hvernig hemlun var háttað, notkun bílbelta og þá krafta sem verða við árekstur ef loftpúðar springa út.

Í einum 14 fylkjum Bandaríkjanna hefur löggæsla, tryggingafélög og lögfræðingar heimild til þess að lesa úr svarta boxinu eftir árekstur í leit sinni að ástæðum árekstra svo leysa megi úr réttarstöðu hlutaðeigandi aðila.