Hraðametstilraun var síðasta hjólaferðin

Núverandi hraðaheimsmethafi á mótorhjóli, Bill Warner lést í Flórída á sunnudaginn. Bill náði 500 km hraða á aðeins 2,4 kílómetra langri braut árið 2011 og ætlaði að bæta það met um helgina á enn styttri braut.

Þegar hann hafði náð um 460 km hraða missti hann stjórn á hjóli sínu og ekki var að spyrja að afleiðingum þess á slíkri ferð. Hann var reyndar með meðvitund eftir slysið og talaði við þá er komu að slysinu, en hann dó klukkutíma síðar af sárum sínum á spítala.

Bill Warner var 44 ára gamall og tilraun hans að þessu sinni var gerð á Loring herflugvellinum í Flórída. Fákur Bill var mikið breytt Suzuki Hayabusa og urðu 400 áhorfendur vitni af þessu hörmulega slysi.

Þetta var reyndar ekki í fyrsta sinn sem Bill Warner dettur af hjóli sínu á mikilli ferð, en í myndskeiðinu hér að ofan sést þar sem hann nær 430 km ferð á flugvelli í fyrra. Hann bremsar sig niður en flugbrautin klárast þegar hann er ennþá á um 170 km hraða og fellur í möl sem við tekur og rennur lengi eftir henni.