Skoda og Suzuki þeir bilanafríustu

FDM í Danmörku, systursamtök Félags íslenskra bifreiðaeigenda, hefur tekið saman athugasemdir sem gerðar voru við 69.000 notaða bíla sem færðir voru í ástandsskoðun hjá skoðunarstöðvum í Danmörku. Að meðaltali fær hver notaður bíll 5,8 athugasemdir. Skoda er það merki sem stendur sig best, með 4,7 athugasemdir að meðaltali á hvern bíl, en Suzuki kemur þar skammt undan með 4,8 athugasemdir.

Verst virðist ástandið hjá hinum ítalska Alfa Romeo sem fær langflestar athugasemdir við ástandsskoðun, eða að meðaltali 8,3. Það kemur eflaust mörgum á óvart að Mercedes-Benz er með næst verstu útkomuna hvað þetta varðar, eða 7,5 athugasemdir að meðaltali. FDM bendir þó á að Mercedes-Benz greini sig frá öðrum merkjum að því leyti að um eldri bíla er að ræða sem hefur verið ekið meira, enda í mörgum tilfellum leigubílar.

Suzuki, hinn japanski framleiðandi smábíla og fjórhjóladrifinna bíla og jeppa, kemur glimrandi vel út úr könnun FDM. Að meðaltali eru athugasemdirnar aðeins 4,8 og nartar Suzuki því í hælana á Skoda, en tékkneski framleiðandinn fær þarna enn eina rósina í hnappagatið. Toyota er sömuleiðis í góðum málum með 4,9 athugasemdir að meðaltali.

Alfa Romeo 156 nýtur þess vafasama heiðurs að fá flestar athugasemdirnar, eða 8,3 að meðaltali, en á svipuðum slóðum eru merki eins og Renault, Mercedes-Benz, Fiat og Mitsubishi. Þótt athugun FDM segi kannski ekki alla söguna um gæði bíla getur fólk haft þennan lista til hliðsjónar þegar lagt er í að kaupa notaðan bíl.

Þau fimm merki sem flestar athugasemdir fengu:

Alfa Romeo: 8,3 athugasemdir að meðaltali á hvern bíl

Mercedes-Benz: 7,5 athugasemdir að meðaltali á hvern bíl

Fiat: 7,2 athugasemdir að meðaltali á hvern bíl

Renault: 6,4 athugasemdir að meðaltali á hvern bíl

Mitsubishi: 6,4 athugasemdir að meðaltali á hvern bíl