Jay Leno fær sér Volgu

Bíllinn var áður í eigu KGB til afnota fyrir starfsfólk leyniþjónustunnar.

Hann er stór bílskúrinn hjá þáttastjórnandanum hökunetta, Jay Leno. Þrátt fyrir allan sinn auð eru í honum ekki bara rándýrir sportbílar og lúxuskerrur og það gerir einmitt bílasafn Jay Leno svo athyglivert. Nýjast bíllinn í safni hans er þessi 1966 árgerð af Volgu frá GAZ fyrirtækinu rússneska. Margir Íslendingar sem komnir eru aðeins til ára sinna þekkja þennan grip.

Bíllinn var í eigu KGB, til afnota fyrir starsfólk leyniþjónustunnar, en er nú kominn í sólina í Kaliforníu. Hann er með 2,5 lítra og 95 hestafla vél, sem er ekki svo lítið fyrir þess tíma bíl. Hann er í ótrúlegu góðu ásigkomulagi, enda segir Jay Leno í meðfylgjandi myndskeiði að bíllinn sé svo til ryðfrír og sé byggður eins og skriðdreki. Leno segir einnig frá því að lítill munaður, þ.e. búnaður til þæginda sé að finna í bílnum, ekki frekar en í skriðdrekum.