Gjörbylting fyrir starfsfólk í Langá

"Þetta er algjör bylting fyrir starfsfólkið," segir Einar Ole Pedersen, formaður Veiðifélags Langár, um nýja viðbyggingu við Langárbyrgi.

Í nýju viðbyggingunni, sem er 133 fermetrar, eru fimm svefnherbergi og setustofa. Þrjú svefnherbergi á sameiginlegum gangi eru ætluð starfsfólki veiðihússins. Tvö önnur svefnherbergi sem hafa sérinngang frá bílastæðunum eru ætluð leiðsögumönnum og jafnvel veiðimönnum einnig.

Jóhann Gunnar Arnarsson og félagar úr árnefnd Langár fluttu í gær rúm og önnur húsgögn frá bænum Stangarholti yfir í nýja húsið. Leiðsögumenn við ánna hafa haft aðstöðu í Stangarholti en fá nú samastað í Langárbyrgi.

Nýja viðbyggingin er því sem næst full frágengin. Það ætti ekki að væsa um mannskapinn þegar veiðin hefst í Langá 20. júní.