Bakka með næturbannið á Þingvöllum

Ákvörðun um bann við veiði á nóttunni í Þingvallavatni verður afturkölluð á fundi Þingvallanefndar í næstu viku.

Álfheiður Ingadóttir, formaður Þingvallanefndar, kveðst fagna aðkomu stangveiðimanna að málinu og miklum skilningi þeirra á þörf þess að vernda Þingvallavatn.

Hluti samkomulagsins felst í að Þingvallanefnd bætir veiðivörslu að næturlagi og Veiðikortið hyggst umbuna sjálfboðaliðum sem taka að sér veiðivörslu með eintaki af Veiðikortinu.

Ingimundur Bergsson, framkvæmdastjóri Veiðikortsins, segir málið nú hafa fengið farsælan endi.

Samkomulag sem Ólafur Örn Haraldsson þjóðgarðsvörður náði við veiðimenn verður formlega afgreitt á fundi Þingvallanefndar í næstu viku. Veiði í Þingvallavatni hefst ekki fyrr en 1. maí.