Aron P.: Erfitt að leika gegn þessu tekníska liði

„Þeir eru mjög erfiðir viðureignar, það verður að segjast og þeir spila skemmtilegan bolta. Þeir eru ekki stærstir og sterkastir en eru gríðarlega teknískir en við náðum að halda haus í 60 mínútur og það þarf gegn svona liði. Við náðum að keyra hraðann upp í seinni hálfleik og það gerði gæfu muninn," sagði Aron Pálmarsson sem skoraði 9 mörk fyrir Ísland gegn Slóveníu í dag.

„Sóknarleikurinn var mjög góður og mér fannst allir spila vel sóknarlega. Það vantaði aðeins upp á vörn og markvörslu en sóknarleikur og þetta annað, þriðja tempó í seinni hálfleik sem gerði gæfumuninn.

„Mér fannst við ekki byrja leikinn nógu vel. Við gerðum tæknifeila í sókninni og mér fannst þeir skora eftir okkar mistök í fyrri hálfleik. Við köstum í hendurnar á þeim. Það er kjánalegt en við náðum að bæta það í seinni hálfleik og vorum öruggari í okkar aðgerðum, sagði Aron sem var að vonum mjög sáttur við að tryggja sætið á Evrópumeistaramótinu í Danmörku.