Ungir kaupa kóreska bíla í stað japanskra

Hlutdeild bandarískra og evrópskra bíla fer einnig stækkandi á kostnað þeirra japönsku.

Fólk á aldrinum 18 til 34 í Bandaríkjunum kaupir enn mikið af japönskum bílum en hlutfallið fer þó sífellt lækkandi og hlutur kóreskra, bandarískra og þýskra bíla fer að sama skapi hækkandi. Kaupendur á aldrinum 18 til 24 völdu að 42,6% hluta japanska bíla en fyrir fjórum árum voru það 52,3% þeirra.

Hlutur bandarískra bíla jókst um 2%, evrópskra um 1% en kóreskra um 7%. Nú eru kóreskir bílar með 12,6% hlutdeild í þessum aldurshópi. Fólk á aldrinum 25 til 34 keypti aðeins að 5% hluta kóreskra bíla árið 2008 en nú að 10% hluta. Það má því segja að sigurvegarnir undanfarin ár í Bandaríkjunum séu kóreskir.

Ástæður þessa eru helst taldar gæði kóreskra bíla og hversu vel þeir koma út úr öllum könnunum hvað varðar bilanir, verðfall og endingu. Það eru bílar eins og Hyundai Accent og Elantra og Kia Rio, Soul og Forte sem eiga stærstu bitana í góðri sölu kóreskra bíla vestanhafs.