Fallegasti bíltúr í heimi?

Farið er yfir 15 fjallaskörð í ölpunum og endað í Monte Carlo.

Route des Grandes Alpes er árleg ferð eigenda þýskra sportbíla sem verður farin þetta árið frá 31. ágúst til 4. september. Leiðin liggur frá hinu fagra franska stöðuvatni Annecy, ekki fjarri ölpunum, gegnum staði eins og Val d´Isére og Briancon alla leið til Monte Carlo á frönsku Rívíerunni.

Ekin er 700 km vegalengd á þremur dögum. Á leiðinni er farið yfir ein 15 fjallaskörð í Ölpunum sem liggja hátt yfir sjávarmáli. Fjöldi þátttakenda er takmarkaður við aðeins 15 bíla, svo samkeppnin um sætin er hörð, en örugglega þess virði.

Aðrir geta náttúrulega farið sömu leið á öðrum tíma á eigin vegum og notið eins og hinir. Skipulagða ferðin kostar aðeins 2.450 Evrur, eða 400.000 krónur og innfelur fjögurra nátta gistingu á lúxuhótelum, kvöldmat og kokteila öll kvöldin!