16 strokka Rolls Royce

Rolls Royce er einnig að hugleiða smíði jeppa.

Ekki eru allir bílaframleiðendur með hugann við að smækka vélarnar í bíla sína. Á teikniborðinu hjá Rolls Royce er nýr blæjubíll sem bílatímaritið Car segir að verði með samskonar vél og er í Bugatti Veyron og er 16 strokkar. Hún yrði þó ekki eins öflug, en skilaði samt 700 hestöflum.

Vélin styðst ekki við túrbínu eða hverfilblásara. Vegna stærðar hennar verður húddið á bílnum lengra en í flestum Rolls Royce bílum og farþegarýmið ýtist fyrir vikið aftur. Þessi bíll yrði fyrst til sölu árið 2017, ef á annað borð verður af smíði hans. Í fljótu bragði má telja að ekki sé svigrúm fyrir svo stóra og þar af leiðandi mengandi vél í lögum þeim sem krefja bílaframleiðendur til að minnka útblástur bíla sinna.

Rolls Royce er víst einnig að hugleiða smíði á jeppa og ef af stærsti samkeppnisaðilinn, Bentley mun láta verða af áformum sínum um smíði jeppa aukast líkurnar á að það verði.