Allir GM bílar 4G nettengdir

Audi ætlar að bjóða 4G tengingu í A3 bílinn strax í ár.

General Motors veðjar svo sterklega á kröfu bíleigenda um nettengingu í bílnum að það ætlar að útbúa svo til alla bíla sína þannig frá og með árinu 2015. Verða bílarnir með háhraða 4G nettengingu og ætlar GM að bindast samstarfi við AT&T símafyrirtækið til að gera þetta mögulegt.

Þó byrjað verði á heimavelli mun GM á endanum mun bjóða nettengingu fyrir bíla sína á öllum markaðssvæðum heimsins. Með þessari nýju tækni þarf ökumaður ekki neinn síma, hvorki eigin snjallsíma né innbyggðan síma í bílnum og ætti það að vera góðar fréttir hvað umferðaröryggi varðar.

Annar kosturinn við slíka háhraðatengingu í bílinn er að hægt verður að uppfæra hugbúnaðinn sem upplýsinga- og afþreyingarbúnaður bílsins byggir á, en hann á nú til að úreldast hratt. Kemur það sér sérlega vel fyrir uppfærslu leiðsögukerfa.

GM er ekki eina bílafyrirtækið sem ætlar að setja 4G tengingu í bíla sína en Audi verður með slíka tengingu í A3 bílum sínum strax á þessu ári fyrir bæði Evrópu- og Bandaríkjamarkað. Á síðasta ári bauð Mercedes Benz 3G tengingu fyrir marga af sínum bílum og Chrysler einnig fyrir 3 af bílgerðum sínum.

Með þessu nýja kerfi GM gæfist farþegum í aftursæti möguleiki á að streyma efni til samtíma áhorfs á þar til gerðum skjám. Brátt verður bíllinn orðinn eins og bíósalur, eða allir verða á internetinu, nema vonandi bílstjórinn.