Sverre verður áfram þótt liðið falli

Grosswallstadt gaf það út í dag að varnartröllið Sverre Jakobsson hafi skrifað undir eins árs samning við félagið, en Sverre greindi sjálfur frá því á Facebook-síðu sinni í gær að hann yrði áfram hjá félaginu.

Grosswallstadt á í mikilli fallbaráttu í þýsku úrvalsdeildinni en liðið er í næstneðsta sæti deildarinnar með sjö stig eftir 20 leiki. Liðið er sem stendur fjórum stigum frá öruggu sæti.

Liðið vann reyndar mikilvægan sigur á Wetzlar, 28-26, á föstudaginn síðastliðinn en það var fyrsti leikur Rúnars Kárasonar með liðinu. Hann skoraði fjögur mörk en Rúnar er nýbúinn að jafna sig á krossbandsslitum.

Samkvæmt samningi Sverre, sem er einnig fyrirliði Grosswallstadt, verður hann áfram hjá liðinu þó svo að það falli í B-deildina.

Sverre, sem er 36 ára gamall, er í miklum metum hjá stuðningsmönnum liðsins. „Við fögnum þess mjög að hann hafi ákveðið að taka eitt tímabil til viðbótar með okkur," sagði framvkæmdarstjórinn Guido Heerstrass við þýska fjölmiðla.