Fróðleiksmolar um bleikjuna

Veiðimenn eru sérfræðingar í því að stytta sér og öðrum stundir fram að þeim tíma að mögulegt er að halda til veiða. Vetrarstarf stangveiðifélaganna er þar mikilvægur hlekkur og verður mörgum veiðimanninum einfaldlega til lífs á meðan beðið er. Norðan heiða héldu Stangveiðifélög Akureyrar (SVAK), Flúða og Flugunnar eitt slíkt á mánudagskvöldið þegar Erlendur Steinar Friðriksson, fyrrverandi formaður SVAK, hélt fyrirlestur um bleikjuna, þennan dyntótta en ástsæla fisk sem allir veiðimenn njóta að eltast við.

Erlendur er með meiru öflugur veiðibloggari og Veiðivísir vill eindregið benda áhugamönnum að fylgjast grannt með hugleiðingum hans um stangveiði og skyld efni hér.

Í erindi sínu á mánudag fjallaði Erlendur um hvað er að gerast hjá bleikjustofnum landsins; farið var meðal annars yfir helstu mögulegu þætti þess hvers vegna minnkandi bleikjuveiði er staðreynd í mörgum góðum bleikjuám. Að loknu erindinu deildi Erlendur skýringarmyndum sínum á bloggsíðu sinni og er þar margt mjög áhugavert að finna, og það þó skýringar hans fylgi ekki í smáatriðum.

Hægt er að nálgast skýringarmyndir fyrirlestursins hér. Má með sanni segja að samantektin er fróðleg, bæði hvað varðar lífshætti bleikjunnar og veiði liðinna ára sem og hvers má vænta í framhaldinu.

svavar@frettabladid.is