Rory McIlroy hleður á sig viðurkenningum

Rory McIlroy var í sérflokki í kjöri á kylfingi ársins hjá samtökum golfíþróttafréttamanna í Bandaríkjunum. Norður-Írinn fékk 190 atkvæði af alls 194 í efsta sætið. Bandaríkjamaðurinn Brand Snedeker, sem sigraði í Fed-Ex úrslitakeppninni fékk þrjú atkvæði og landi hans Tiger Woods fékk eitt.

McIlroy hefur hlaðið á sig verðlaunum á þessu ári en hann var einnig kjörinn kylfingur ársins á PGA mótaröðinni, Evrópumótaröðinni og hjá golfíþróttafréttamönnum á Bretlandseyjum. Hann var einnig kylfingur ársins hjá samtökum PGA kylfinga í Bandaríkjunum.

Stacy Lewis er kylfingur ársins í kvennaflokki hjá samtökum golfíþróttafréttamanna í Bandaríkjunum en hún fékk 79% atkvæða. Roger Chapman er kylfingur ársins í +50 ár flokknum.

Þetta er í fjórða sinn á síðustu fimm árum þar sem að kylfingur frá Evrópu fær þessa viðurkenningu í karlaflokknum.