Sumarveiðin var aðeins fimm silungar

Sterk umræða er nú meðal stangveiðimanna um verðlag og aflabrögð. Margir hafa á orði að snúa baki við laxinum og halla sér að silungsveiði í staðinn. Þar er ekki alltaf á vísan að róa.

Laxveiðin í Svartá í Austur-Húnavatnssýslu var með slakasta móti í sumar eins og svo víða annars staðar. Aðeins veidust 148 laxar á stangirnar fjórar. Í fyrra var veiðin hins vegar 300 laxar sem er mun nærri meðalveiðinni.

Segja má að laxveiðin í Svartá í sumar hafi þó verið hátíð miðað við uppskeruna á silungasvæðinu. Aðeins fimm fiskar voru þar skráðir á land á stangirnar tvær sem þar eru leyfðar og seldar. Stangardagurinn þar næsta sumar kostar 4.400 krónur. Veiðihús fylgir ekki.