Ryder-keppnin í golfi | Bandaríkin í góðri stöðu

Fyrsti dagur Ryder-keppninnar í golfi er liðinn og það eru Bandaríkjamenn sem leiða, 5-3, eftir skemmtilegan dag. Í þessari keppni mætast Bandaríkin og úrvalslið Evrópu.

Fyrri part dags var spilaður fjórmenningur og eftir þá leiki var staðan 2-2. Keegan Bradley og Phil Mickelson lögðu þá Luke Donald og Sergio Garcia. Tiger Woods, sem lék afar illa, og Steve Stricker töpuðu aftur á móti gegn Justin Rose og Ian Poulter.

Graeme McDowell og Rory McIlroy lögðu Jim Furyk og Brandt Snedeker á lokaholunni. Jason Dufner og Zach Johnson unnu svo flottan sigur á Lee Westwood og Francesco Molinari.

Þá tók við fjórbolti og þar voru heimamenn sterkari en keppnin fer fram á Medinha-vellinum í Chicago.

Webb Simpson og Bubba Watson voru búnir að afgreiða þá Paul Lawrie og Peter Hanson þegar fjórar holur voru eftir. 3-2 fyrir Bandaríkin.

Bandaríkin komust svo í 4-2 þegar Phil Mickelson og Keegan Bradley skelltu Rory McIlroy og Graeme McDowell þegar ein hola var eftir. Glæsilegt upphafshögg Mickelson á par þrjú holu tryggði þeim sigurinn. Hann var ekki fjarri því að fara holu í höggi.

Matt Kuchar og Dustin Johnson komu Bandaríkjunum í 5-2 er þeir lögðu þá Justin Rose og Martin Kaymer er tvær holur voru eftir.

Þá var aðeins einn leikur eftir. Tiger Woods og Steve Stricker gegn Nicolas Colsaerts og Lee Westwood. Evrópubúarnir voru lengstum yfir, þökk sé frabærum leik Belgans Colsaerts, en Tiger vaknaði á síðustu holunum og kom Bandaríkjamönnum inn í leikinn.

Þegar allt útlit var fyrir að Bandaríkin myndu jafna á 17. holu setti Colsaerts niður frábært pútt og jafnaði holuna. Magnaður dagur hjá Belganum.

Á lokaholunni átti EVrópu því einn vinning. Bandaríkin urðu því að vinna holuna til að fá hálfan vinning. Stricker lenti í veseni og pressan því öll á Tiger. Hann átti besta höggið inn á flöt og mikil spenna.

Colsaerts aðeins lengra frá og hann missti sitt pútt en tryggði næsta högg. Tiger varð því að setja niður til þess að vinna holuna fyrir Bandaríkin og fá hálfan vinning.

Öll pressan á Tiger og þar er hann oft bestur. Púttið var langt en Tiger var svo nálægt því að setja niður. Evrópa slapp með skrekkinn og fékk einn vinning í fjórboltanum.