„Stórfiskar kafa víða um vatnamótin"

Líf er að færast í sjóbirtingsveiðina í Tungufljóti. Á tveimur tímum í gærkvöldi veiddust þrír birtingar sem voru allt að tíu punda þungir.

Á vef Stangaveiðifélags Reykjavíkur segir að rignt hafi duglega eystra síðustu daga og því sé útlit fyrir að birtingurinn sé snemma á ferðinni.

„Veiðimenn sem leið áttu um úr laxlausri á í nágrenninu fengu að veiða tvo tíma nú undir kvöld [gærkvöld]," segir á vef SVFR. „Sögðu þeir mikið af birtingi mætt í Syðri-Hólma, náðu þar þremur fiskum á stuttum tíma - allt að tíu pundum. Undir kvöldið lygndi á þessum slóðum og mátti þá sjá stórfiska kafa víða um vatnamótin."

Í fyrra veiddust 264 sjóbirtingar í Tungufljóti, 42 laxar og 3 bleikjur.

trausti@frettabladid.is