Lífsmark í Svartá á döpru sumri

Dálítið líf virðist vera í Svartá í Svartárdal þótt sumarið hafi verið gríðar dauft. Að því er segir á söluvef leigutakans Lax-ár fékk holl sem lauk veiðum í gær átta laxa.

Á agn.is segir að þótt Svartá hafi verið með rólegasta móti í sumar hafi áðurnefnt holl fengið þessa átta laxa og misst fleiri að auki.

"Mest líf var í Ármótum, Brúnarhyl og Rafstreng. Þessi veiði þykir nokkuð góð miðað við að kuldakast var fyrir norðan um helgina. Laxarnir voru á bilinu 65 – 89 sentímetra langir og voru allir vel haldnir. Þeim stærri sleppt eins og lög gera ráð fyrir," segir á agn.is.

Samkvæmt nýjustu tölum Landssambands veiðifélaga höfðu 95 laxar veiðst í sumar í Svartá fyrir réttri viku síðan. Í fyrra var sumarveiðin alls 300 laxar og 572 laxar árið þar á undan.

gar@frettabladid.is