Tilboð á stökum degi í Langá

Stangaveiðifélag Reykjavíkur hyggst bjóða félögum sínum tilboðsdaga endrum og sinnum fram á haust. Í dag býðst dagur í Langá á 49 þúsund krónur.

"Það eru lausar sex stangir í Langá í einn dag frá 5-6. ágúst næstkomandi, frá hádegi til hádegis. Verð á dagsstöngina er krónur 49.000 - en gist er í Langárbyrgi í eina nótt," segir á svfr.is.

Fram kemur að ekki sé í boði að kaupa tilboðstangirnar á vefnum heldur geti félagsmenn nálgast þær með því að hringja á skrifstofuna til klukkan fjögur í dag.

Miðað við verðskrá SVFR á vefnum er venjulegt verð til félagsmanna á þessum degi um 97.300 krónur.