Risaurriði veiddist í Grænavatni

Átján punda urriði veiddist í Grænavatni í fyrradag. Á vefsíðu Veiðivatna segir að sennilega sé þetta stærsti urriði sem veiðst hafi á stöng í vötnunum.

"Kunnugir telja að margir svona stórir leynist í Grænavatni svo ef til vill eiga fleiri álíka eða stærri eftir að koma þar á land," segir á síðu Veiðivatna.

Fréttablað Suðurlands, dfs.is, segir frá því að veiðimaðurinn slyngi sem náði að krækja í þennan risafisk heiti Haukur Böðvarsson. Þar kemur ennfremur fram að fiskurinn hafi mælst 83 sentímetra langur og 50 sentímetrar að ummáli. Fiskurinn vó 8,2 kíló.

Á síðu Veiðivatna segir að urriðinn sé 16,4 pund og er þá átt við svokölluð íslensk pund en þá er kílóafjöldinn margfaldaður með tveimur. Fiskurinn var hins vegar 18 ensk pund en sú þyngd er fundinn út með því að margfalda kílóafjöldann með 2,2.

Heildarveiðin í Veiðivötnum nálgast nú 15 þúsund fiska og er meðaþyngdin ríflega 2 pund.

trausti@frettabladid.is